گوگل اکاؤنٹ کا ڈیٹا براہ راست ڈراپ باکس یا ون ڈرائیو میں منتقل کریں

از ادارہ مورخہ اگست 30، 2016

گوگل ایجادات کے لئے معروف ہے۔ صارفین گوگل کی سروسز کے اسی لئے گرویدہ ہیں کہ اس کی مصنوعات میں جدت بھی ہوتی ہے اور ان میں صارف کا بھرپور خیال رکھا جاتاہے۔ اگر آپ گوگل کی سروسز سے ناراض ہیں، تب بھی گوگل آپ کو ہنسی خوشی اپنا ڈیٹا گوگل کے سرورز سے اٹھا کر کہیں بھی لے جانے کی سہولت دیتا ہے۔

گوگل نے Takeoutنامی سروس کا آغاز 2011ء میں کیا تھا۔ اس سروس کے ذریعے گوگل کے صارفین اپنا ڈیٹا مثلاً جی میل میں موجود آپ کے ای میل پیغامات، گوگل ڈرائیو پر موجود فائلیں، رابطہ نمبرز اور ای میل ایڈریسز، کلینڈر ڈیٹا، بلاگر ڈیٹا، گوگل فوٹوز وغیرہ ڈاؤن لوڈ کرسکتے ہیں۔ پانچ سال پرانی اس سروس کو گوگل تواتر سے اپ ڈیٹ کرتا رہتا ہے اور جیسے گوگل کی سروسز میں اضافہ ہوتا جارہا ہے، ٹیک آؤٹ پر دستیاب آپشنز کی تعداد بھی بڑھتی جارہی ہے۔

ایسا مشکل ہی ہے کہ آپ گوگل کی سروسز سے جان چھڑانے کے لئے ان کے سرورز سے اپنا ڈیٹا اٹھا کر کہیں لے جانا چاہتے ہوں۔ بلکہ گوگل ٹیک آؤٹ کو آپ اپنے قیمتی ڈیٹا کا بیک اپ بنانے کے لئے استعمال کرنا چاہیں گے۔ اسی سال فروری کے آخری ہفتے میں گوگل نے ٹیک آؤٹ میں مزید سہولیات اور بہتری کا اعلان کیا۔ اب آپ گوگل کے سرورز پر موجود اپنے قیمتی ڈیٹا کا بیک اپ براہ راست ڈراپ باکس یا مائیکروسافٹ وَن ڈرائیو کلاؤڈ اسٹوریج پر کرسکتے ہیں۔ اس سے پہلے گوگل ٹیک آؤٹ کے ذریعے آپ اپنا ڈیٹا یا تو ڈاؤن لوڈ کرسکتے تھے یا پھر اسے گوگل ہی کی کلاؤڈ اسٹوریج سرور گوگل ڈرائیو پر بیک اپ کرسکتے تھے۔ گوگل ٹیک آؤٹ تک رسائی کے لئے یہ ربط ملاحظہ کریں:
https://www.google.com/settings/takeout

اگر آپ گوگل اکاؤنٹ میں پہلے سے سائن اِن نہیں ہیں تو ٹیک آؤٹ آپ سے پہلے لاگ اِن ہونے کو کہے گا۔ آپ اپنے گوگل اکاؤنٹ کے یوزر نیم اور پاس ورڈ کے ذریعے لاگ اِن ہوجائیں۔ اب آپ کو ان تمام سروسز کی فہرست نظر آئے گی جن کا ڈیٹا آپ ڈاؤن لوڈ کرسکتے ہیں۔ جس سروس کے سامنے سبز رنگ کے ٹِک کا نشان موجود ہے، اس کا ڈیٹا ایکسپورٹ کیا جائے گا۔ آپ جس سروس کا ڈیٹا ایکسپورٹ نہیں کرنا چاہتے، اسے کے سامنے موجود سبز رنگ کے نشان پر کلک کرکے اسے غیر منتخب کردیں۔ اسی طرح آپ سروس کے نام پر کلک کرکے اس کے متعلق آپشنز متعین کرسکتے ہیں۔ مثلاً آپ جی میل کی سروس پر کلک کرکے یہ منتخب کرسکتے ہیں کہ کس لیبل کے تحت موجود پیغامات کو ڈاؤن لوڈ کیا جائے اور کن پیغامات کو ایکسپورٹ نہ کیا جائے۔

اس کے بعد سروسز کی فہرست کے نیچے موجود Next کے نیلے بٹن پر کلک کریں۔ اگلے مرحلے میں ٹیک آؤٹ آپ کو بتائے گا کہ آپ نے کون کون سی سروسز کا ڈیٹا ایکسپورٹ کرنے کے لئے منتخب کیا ہے۔ یہ ڈیٹا آرکائیو فائل کی شکل میں محفوظ کیا جاتا ہے اور آپ اسے زِپ یا tgzیا tbz فارمیٹ میں محفوظ کرسکتے ہیں۔ یاد رہے کہ یہ تینوں فارمیٹ آپ WinRAR کے ذریعے کھول سکتے ہیں اور تمام ڈیٹا دیکھ سکتے ہیں۔
فائل ٹائپ منتخب کرنے کے بعد Delivery method کی ڈراپ ڈاؤن لسٹ میں سے آپ Add to Dropboxیا Add to OneDrive کا انتخاب کرلیں۔ آخری مرحلے کے طور پر آپ Link account and create archiveکے بٹن پر کلک کردیں۔

تحریر جاری ہے۔ یہ بھی پڑھیں

ایسا جادوئی فون جسے مالک کے علاوہ کوئی استعمال نہیں کر سکتا

دسمبر 19، 2016

یونی ورسل پاس ورڈ منیجر ڈیش لین اب لینکس کے لیے بھی دستیاب

نومبر 10، 2017

اس کے ساتھ ہی گوگل ٹیک آؤٹ آپ کو آپ کے انتخاب یعنی ڈراپ باکس یا وَن ڈرائیو کی لاگ ان اسکرین کی جانب لے جائے گا۔ آپ اپنے ڈراپ باکس/ون ڈرائیو یوزر نیم اور پاس ورڈ سے لاگ اِن ہوجائیں۔
ڈراپ باکس / ون ڈرائیو آپ سے اجازت طلب کرے گا کہ آیا Google Download Your Data کو آپ کے ڈراپ باکس / ون ڈرائیو اکاؤنٹ تک رسائی دی جائے۔ آپ Allowکے بٹن پر کلک کردیں۔

اس کے ساتھ ہی گوگل ٹیک آؤٹ آپ کے ڈیٹا کو جمع کرکے اس کی آرکائیو فائل بنانا شروع کردے گا۔ اگر آ پ نے کئی سروسز کا ڈیٹا ایکسپورٹ کرنے کے لئے منتخب کیا ہے تو اس میں کافی وقت لگ سکتا ہے۔ خصوصاً جی میل کا ڈیٹا ایکسپورٹ ہونے میں خاصا وقت لگتا ہے۔ لیکن چونکہ یہ سارا کام خود کار طریقہ سے ہوتا ہے، اس لئے آپ یہ کام ٹیک آؤٹ کے حوالے کرنے کے بعد آرام کرسکتے ہیں۔جیسے ہی یہ عمل مکمل ہوگا، آپ کو بذریعہ ای میل مطلع کردیا جاتا ہے اور آپ اپنا ڈیٹا ڈراپ باکس / ون ڈرائیو پر ملاحظہ کرسکیں گے۔ اب آپ نے خیال یہ رکھنا ہے کہ جس فولڈر میں یہ ڈیٹا ہے، وہ شیئر نہ ہو۔ ورنہ آپ کا نجی نوعیت کے ڈیٹا کا بیک اپ وبال جان بن سکتا ہے۔

ایک بات اور دھیان میں رکھیں گے کہ اگر آپ نے آرکائیو فائل فارمیٹ میں zip منتخب کیا تھا اور آپ کا ڈیٹا 2 گیگا بائٹس سے زیادہ سائز کا ہے تو گوگل ٹیک آؤٹ اس ڈیٹا کو 2، 2 گیگا بائٹس کی فائلوں کی شکل میںمحفوظ کرے گا۔

(یہ تحریر کمپیوٹنگ شمارہ جولائی 2016 میں شائع ہوئی)