کالر آئی ڈی اور کال بلاکنگ کے لیے فیس بک ہیلو

از علمدار حسین مورخہ جولائی 21، 2015

فیس بک نے ایک نئی ایپلی کیشن ’’فیس بک ہیلو‘‘ کے نام سے پیش کی ہے۔ یہ ایپ اینڈروئیڈ کے فون ڈائیلر کی جگہ لے لیتی ہے۔ لیکن یہ صرف بنیادی قسم کا ڈائیلر نہیں بلکہ اضافی فیچرز کی حامل ایپ ہے۔ اگر آپ کو ’’ٹروکالر‘‘ ایپلی کیشن یاد ہو تو فیس بک ہیلو کو سمجھنا آسان ہو جاتا ہے۔ ٹروکالر جیسے فیچرز فیس بک ہیلو میں فراہم کیے گئے ہیں۔ یعنی ایسے نمبرز جو آپ کی فون بک میں محفوظ نہیں ہوں گے ان کی طرف سے کال آنے پر آپ کو یہ ایپ بتائے گی کہ کال کرنے والا کون ہے۔ ظاہر ہے اس کے پیچھے فیس بک کا ہاتھ ہے، وہ نمبر اگر کسی فیس بک اکاؤنٹ میں درج ہے تو فیس بک ہیلو اس کا نام ظاہر کر دے گی۔ اس کے علاوہ اس میں کال بلاکنگ کا فیچر بھی موجود ہے۔ یقیناً یہ ایپ ایک شاندار سروس ثابت ہو گی، کیونکہ ٹروکالر کے کام کرنے کا طریقہ کار انتہائی متنازعہ تھا۔ لیکن دیکھنا یہ ہے کہ آیا صارفین اس ایپلی کیشن کو خوش آمدید کہتے ہیں یا اپنی پرائیویسی کے لیے خطرہ گردانتے ہیں۔

آئیے اب ذرا اس ایپلی کیشن کا مزیدہ جائزہ لیتے ہیں۔ اس ایپ کو استعمال کرنے کے لیے آپ کے پاس فیس بک اکاؤنٹ موجود ہونا ضروری ہے کیونکہ ایپ کا استعمال شروع کرتے وقت فیس بک آئی ڈی سے لاگ اِن ہونا پڑتا ہے۔ لاگ اِن ہونے کے بعد آپ اس کے تمام فیچرز جیسے کہ کالر آئی ڈی، کال بلاکنگ، دوستوں کی تلاش، آٹو سنک اور فیس بک اکاؤنٹس کی معلومات وغیرہ۔

فیس بک ہیلو اینڈروئیڈ کے ڈائیلر کی طرح ہی کام کرتی ہے۔ اس میں آپ کال ہسٹری اور کانٹیکٹس وغیرہ دیکھ سکتے ہیں۔ کالرآئی ڈی اور کال بلاکنگ کے فیچرز کو کنفیگر کیا جا سکتا ہے، کال اور تلاش کی ہسٹری کو بھی حذف کیا جا سکتا ہے۔

اس ایپ کی انسٹالیشن کے بعد جب آپ کے فون پر کوئی کال آئے گی تو اس نمبر کے ساتھ جڑا فیس بک اکاؤنٹ دکھایا جائے گا اور اگر وہ نمبر کسی فیس بک اکاؤنٹ میں موجود نہیں ہے تو اس کے ساتھ No match found کا پیغام لکھا ملے گا۔

دیگر اسمارٹ فون میسجنگ سروسز کی طرح اس میں بھی پیغام بھیجنے اور کال کرنے کا آپشن بھی دستیاب ہے، لیکن ان تمام سروسز سے مستفید ہونے کے لیے ضروری ہے کہ آپ کے فون پر انٹرنیٹ چل رہا ہو۔

تحریر جاری ہے۔ یہ بھی پڑھیں

ناسا نے خلا کی خوفناک آوازیں جاری کر دیں

نومبر 1، 2017

الفابیٹ کی کمپنی بوسٹن ڈائنامکس کا چھلانگیں لگاتا نیا روبوٹ

مارچ 2، 2017

فیس بک ہیلو پلے اسٹور سے انسٹال کریں

اگر یہ ایپ پلے اسٹور سے انسٹال نہ ہو تو اس کی apk فائل ذیل میں دیے گئے ربط سے ڈاؤن لوڈ کر کے اپنے فون میں منتقل کریں اور انسٹال کر لیں:

apk فائل ڈاؤن لوڈ کریں

چونکہ اس ایپلی کیشن کے ذریعے آپ کسی بھی فیس بک صارف کو تلاش کر سکتے ہیں اس لیے اگر آپ چاہیں کہ کوئی اجنبی آپ کو تلاش نہ کر سکے تو فیس بک پر اپنی پرائیویسی سیٹنگز ضرور چیک کر لیں:
facebook.com/settings?tab=privacy
اس صفحے پر درج ذیل آپشن دیکھیں:
Who can look you up using the phone number you provided?