سوال:

میں اپنا کمپیوٹر فروخت کرنا چاہتا ہوں۔ لیکن اس کمپیوٹر پر میرا بہت ہی نجی نوعیت کا ڈیٹا موجود ہے جو میں نہیں چاہتا کہ کسی ہاتھ لگے۔ میں نے آپ کے میگزین میں ہی پڑھا تھا کہ ڈیٹا ڈیلیٹ کرنے کے بعد بھی واپس حاصل کیا جاسکتا ہے۔ کیا کوئی ایسا طریقہ ہے کہ میرا ڈیلیٹ کیا ہوا ڈیٹا کسی بھی طرح واپس حاصل نہ کیا جاسکے؟

جواب:

آپ نے درست پڑھا ہے کہ ڈیٹا کو ڈیلیٹ کردینے کے بعد بھی اسے واپس حاصل کیا جاسکتا ہے۔ ہم یہاں فرض کررہے ہیں کہ آپ مائیکروسافٹ ونڈوز استعمال کررہے ہیں۔ جب بھی آپ کسی فائل یا فولڈر کو ڈیلیٹ کرتے ہیں تو وہ ری سائیکل بِن میں جاتی ہے جسے وہاں سے دوبارہ اُس کی جگہ پر بحال کیا جاسکتا ہے۔ اگر آپ رِی سائیکل بِن کو بھی خالی کردیں تب بھی ڈیٹا ہارڈڈسک سے مکمل طور پر حذف نہیں ہوتا۔ ونڈوز اور دیگر آپریٹنگ سسٹم ڈیلیٹ کئے جانے والے ڈیٹا کو ہارڈڈسک سے حذف کرنے کے بجائے اس کو نشان ذد کردیتے ہیں کہ یہ جگہ خالی ہے اور اس پر لکھا جاسکتا ہے۔ اسی لئے ڈیٹا ریکوری سافٹ ویئر ہارڈڈسک پر نشان ذد جگہ کو پڑھ کر فائلیں بحال کرلیتے ہیں۔

ڈیٹا کو اس طرح ڈیلیٹ کرنا کہ اسے دوبارہ بحال یا recover نہ کیا جاسکے، زیادہ مشکل کام نہیں۔ اس کے لئے آپ کو ایک ایسا سافٹ ویئر درکار ہوگا جو کہ ڈیلیٹ ہوچکے ڈیٹا کی جگہ لایعنی قسم کا ڈیٹا بار بار لکھے اور اسے حذف کرے۔ اس طرح اصل ڈیٹا ضائع ہوجاتا ہے اور اس کی جگہ بیکار یا گاربیج ڈیٹا آجاتا ہے۔ اس مقصد کے لئے درجنوں مفت سافٹ ویئر دستیاب ہیں۔ ان میں سے کچھ سافٹ ویئر کے روابط درج ذیل ہیں:

Eraser:    http://eraser.heidi.ie

File Shredder:        http://fileshredder.org

Evidence Nuker:    http://evidencenuker.com