اینڈروئیڈ کی مقبولیت کسی سے ڈھکی چھپی نہیں، بلکہ اس وقت اینڈروئیڈ اپنے عروج پر ہے۔ یہی وجہ ہے کہ ڈیویلپرز نے اپنا رُخ اینڈروئیڈ ایپلی کیشنز کی ڈیویلپمنٹ کی طرف موڑ لیا ہے کیونکہ اینڈروئیڈ ایپلی کیشنز کی مارکیٹ بہت تیزی سے پھیل رہی ہے۔ کیا آپ کو کبھی اینڈروئیڈ کے لیے ایپلی کیشن بنانے کا خیال آیا ہے؟ اگر ہاں تو یقین جانیں یہ بالکل بھی اتنا مشکل نہیں جتنا آپ اسے سمجھتے ہوں گے۔
پروگرامنگ سیکھنے کے لیے کئی ذرائع آن لائن ہی موجود ہیں۔ ان میں سے اکثر ذرائع مفت ہیں تو کچھ پیسے بھی طلب کرتے ہیں، لیکن ان کی فیس آپ کے قریبی کسی انسٹی ٹیوٹ یا یونیورسٹی سے بھی کم ہو گی۔
آن لائن پڑھائی کے موضوع کا ہم پہلے بھی کمپیوٹنگ میں احاطہ کر چکے ہیں، لیکن اس بار ان سروسز کے خاص ان کورسز کا ذکر کریں گے جو اینڈروئیڈ ایپلی کیشنز کی ڈیویلپمنٹ کے لیے مختص ہیں۔ اس کے علاوہ ان اداروں نے اپنی اینڈروئیڈ ایپلی کیشنز بھی مہیا کر رکھی ہیں تاکہ کمپیوٹر سے دُور ہونے کی صورت میں آپ موبائل سے بھی جہاں چاہیں پڑھائی جاری رکھ سکیں ۔

آڈاسٹی  (Udacity)

http://udacity.com

اینڈروئیڈ ڈیویلپمنٹ کی تعلیم سب تک پہنچانے کے لیے گوگل نے آڈاسٹی آن لائن ایجوکیشنل پورٹل سے اشتراک کر لیا ہے۔ اینڈروئیڈ ڈیویلپمنٹ کے حوالے سے مستند تعلیم حاصل کرنے کے لیے اس ویب سائٹ کا رُخ کیا جا سکتا ہے۔
اگر آپ اسمارٹ ایپلی کیشن کی ڈیویلپمنٹ کے حوالے سے مبتدی ہیں تو پہلے ’’یو ایکس ڈیزائن فار موبائل ڈیویلپرز‘‘ کا رُخ کریں:

udacity/course/ud849

یہ بہت ضروری ہے کہ پہلے آپ کو اس حوالے سے بنیادی باتیں پتا ہوں اس لیے اس کورس میں خاص طور پر موبائل ڈیزائن کے حوالے سے بنیادی معلومات فراہم کی جاتی ہے۔ اچھی اینڈروئیڈ ایپلی کیشنز بنانا سیکھنے کا کام اس کورس سے شروع کیا جا جا سکتا ہے۔
اور اگر آپ پروگرامنگ میں بالکل ہی مبتدی ہیں تو ’’جاوا پروگرامنگ سے تعارف‘‘ حاصل کرنے کی ضرورت ہو گی۔ اس کے لیے درج ذیل کورس کو کھولیں:

udacity/course/cs046

ایسے لوگ جنھیں پہلے ہی اینڈروئیڈ ڈیویلپمنٹ کے حوالے سے خاطر خواہ معلومات ہو براہِ راست گوگل کے شاندار ’’ڈیویلپنگ اینڈروئیڈ ایپس‘‘ کورس کا رُخ کر سکتے ہیں:

udacity/course/ud853

یہ کورس گوگل کے اپنے تین ڈیویلپرز پڑھاتے ہیں۔ اس بات سے آپ اس کورس کی افادیت کا اندازہ لگا سکتے ہیں۔ اس کورس میں وڈیوز اور پروگرامنگ ایکسرسائزز کے ذریعے ایک موسمی ایپلی کیشن بنانا سکھایا جاتا ہے۔
اگر آپ اس کے خودکار طریقے سے سکھانے والے سسٹم کو چُنیں تو یہ مفت ہے۔ یہ اس لیے بھی اچھا ہے کہ اگر آپ صرف یہ جاننا چاہتے ہیں کہ واقعی یہ میدان آپ کا ہے یا نہیں۔ یا پھر یہ جانچنا ہو کہ آپ کتنا مستقل مزاجی سے اسے سیکھ رہے اور کتنا نیا علم حاصل کر رہے ہیں۔
لیکن اگر باقاعدہ حقیقی طرز کی کلاسز لینا چاہیں تو اس کے لیے فیس ادا کرنا ہو گی جو کہ 150 امریکی ڈالر کے لگ بھگ ہے۔ ہو سکتا ہے یہ فیس آپ کو زیادہ لگ رہی ہو لیکن اس کے کافی فوائد بھی ہیں۔ اس کلاس میں آپ نے کیا کچھ سیکھا ہے آپ کی کارکردگی کا جائزہ لے کر آرا سے نوازہ جاتا ہے اور کورس مکمل کرنے پر سرٹیفیکٹ بھی دیا جاتا ہے۔ جس کی بدولت آپ فخریہ سب کو بتا سکتے ہیں کہ آپ ایک اینڈروئیڈ ایپس ڈیویلپر ہیں۔

کورسیرا (Coursera)

کورسیرا بھی ایک معروف تعلیمی پورٹل ہے جہاں اینڈروئیڈ پروگرامنگ کے حوالے سے کلاسیں دی جاتی ہیں۔ اس کے ذریعے آپ ’’موبائل کلاؤڈ کمپیوٹنگ وِد اینڈروئیڈ‘‘ کا سرٹیفکیٹ حاصل کر سکتے ہیں۔

coursera/specialization

اور اگر آپ کو ایک خاص کورس آزمانا چاہیں تو ’’پروگرامنگ موبائل ایپلی کیشنز فار اینڈروئیڈ ہینڈ ہیلڈ سسٹمز‘‘ کا انتخاب کریں:

coursera/course/android

آٹھ ہفتوں پر مبنی اس کورس کی کلاسز کے ذریعے آپ جان سکتے ہیں کہ اینڈروئیڈ ایپلی کیشن کیسے بنتی ہے، کیسے نوٹی فیکیشنز دکھاتی ہے، کیسے ڈیٹا کو منظم رکھتی ہے اور وہ دوسری ایپلی کیشنز سے کیسے رابطہ کرتی ہے وغیرہ۔
آڈاسٹی کی طرح کورسیرا کی بھی اینڈروئیڈ ایپلی کیشن موجود ہے جس کے ذریعے پڑھائی کا عمل اسمارٹ فون اور ٹیبلٹ پر بھی جاری رکھا جا سکتا ہے۔

اڈیمی (Udemy)

www.udemy.com

اڈیمی پر بھی کئی اینڈروئیڈ کورسز موجود ہیں۔ تاہم اگر آپ کسی مفت اور ابتدائی کورس کی تلاش میں ہیں تو ’’اینڈروئیڈ فار بگنرز‘‘ سے آغاز کریں:

android-for-beginers

اگرچہ یہ کورس پروگرامنگ کی معلومات رکھنے والوں سے لے کر مبتدی افراد تک کے لیے یکساں مفید ہے۔ تاہم کورس میں داخلہ لینے والوں کو پہلے اینڈروئیڈ کے حوالے سے جاوا کی معلومات کا ہونا ضروری ہے۔ جس کے لیے درج ذیل کورس سے رجوع کیا جا سکتا ہے، جس کی فیس 89 امریکی ڈالر ہے۔

java-essentials

ٹری ہاؤس  (Treehouse)

teamtreehouse.com

ٹری ہاؤس پر اینڈروئیڈ کے حوالے سے بہترین سیکشن موجود ہے۔ جس کی مدد ایک بنیادی اینڈروئیڈ ایپلی کیشن بنائی جا سکتی ہے اور اس ڈیویلپمنٹ کے دوران جاوا کی گتھیاں بھی سلجھائی جا سکتی ہیں۔ دیگر ایجوکیشنل پورٹلز کی طرح یہ بھی صرف اینڈروئیڈ کے موضوع تک محدود نہیں بلکہ یہاں دیگر موضوعات جیسے کہ آئی او ایس، ایچ ٹی ایم ایل، جاوا اور سی ایس ایس وغیرہ کے حوالے سے بھی کورسز موجود ہیں۔ براہ راست اینڈروئیڈ کے سیکشن میں جانے کے لیے درج ذیل ربط پر جائیں:

teamtreehouse.com/library/topic:android

ٹری ہاؤس اپنی خدمات کی بدولت ماہانہ فیس طلب کرتی ہے۔ 25 ڈالر کے بنیادی لیول سے لے کر50 ڈالر کے پروفیشنل لیول یہاں موجود ہیں۔ ٹری ہاؤس کی بھی اینڈروئیڈ ایپلی کیشن دستیاب ہے جس کے ذریعے کمپیوٹر کے علاوہ فون پر بھی سیکھنے کا عمل جاری رکھا جا سکتا ہے۔

اینڈروئیڈ ڈیویلپر ٹریننگ سائٹ

اگر آپ گوگل کے بنائے ٹولز کے ذریعے سیکھنا چاہتے ہیں تو ’’اینڈروئیڈ ڈیویلپر ٹریننگ‘‘ کی ویب سائٹ پر جائیے:

developer.android.com/training/index.html

لیکن یہاں مبتدی حضرات کا داخلہ منع ہے۔ اس ٹریننگ سے وہی لوگ سیکھ سکتے ہیں جو پہلے سے کوڈنگ جانتے ہوں۔ اگر آپ ایک اچھے پروگرامر ہیں تو یہاں موجود ٹیوٹوریئلز کی مدد سے بہت جلد اینڈروئیڈ ایپلی کیشنز بنانا بھی سیکھ سکتے ہیں۔ ان ٹیوٹوریئلز میں اینڈروئیڈ اسٹوڈیو سے تعارف اور طریقہ استعمال، ڈیزائننگ کے اصول، ملٹی میڈیا کا استعمال اور ویئرایبل ڈیوائسز کی سپورٹ کی شمولیت وغیرہ کے بارے میں سکھایا جاتا ہے۔
اگر آپ دیکھنا چاہتے ہیں کہ بڑے لیول کی ڈیویلپمنٹ کیسے کی جاتی ہے تب بھی آپ اس ویب سائٹ پر جا سکتے ہیں۔

ایم آئی ٹی ایپ انوینٹر (MIT App Inventor)

http://appinventor.mit.edu

اگر آپ کوڈنگ کے حوالے سے بالکل یا تھوڑا بہت جانتے ہیں اور جاننا چاہتے ہیں کہ ایک پروگرامر کی طرح کیسے کام کیا جاتا ہے تو ’’ایم آئی ٹی ایپ انوینٹر‘‘ ویب سائٹ پر جائیں۔ یہاں ویژیول پروگرامنگ کے ذریعے سیکھنے کا عمل انتہائی آسان بنایا گیا ہے۔ یہ ویژیول پروگرامنگ سافٹ ویئر دراصل گوگل نے بنایا تھا لیکن اب اس کی تمام تر ڈیویلپمنٹ MIT کے ایجوکیشنل ٹول کے تحت ہو رہی ہے۔

اگرچہ یہاں آپ کوئی ایسی ایپلی کیشن تو نہیںبنا سکتے جو آپ کو راتوں رات امیر بنا دے گی البتہ یہاں کئی کام کی ایپلی کیشنز و گیمز ضرور بنا سکتے ہیں۔ اسے استعمال کرنے کے لیے آپ کے پاس گوگل کا اکاؤنٹ موجود ہونا چاہیے۔ جس سے لاگ اِن ہو کر آپ یہاں کام کر سکتے ہیں اور اپنا کام کلاؤڈ میں محفوظ بھی کر سکتے ہیں۔یہاں اینڈروئیڈ ایپلی کیشنز ڈیویلپمنٹ کے حوالے سے کئی ٹیوٹوریئلز موجود ہیں البتہ آپ کو ایپلی کیشنز کی ریئل ٹائم ٹیسٹنگ کے لیے درج ذیل ربط پر موجود ٹول کی ضرورت ہو گی:

mit-companion

(یہ تحریر کمپیوٹنگ شمارہ نومبر 2014 میں شائع ہوئی)