لینکس منٹ انسٹالیشن گائیڈ

اگلی ونڈو میں انسٹالیشن کی ڈرائیو اور لینکس منٹ کے لیے مختص اسپیس کے بارے میں پوچھا جائے گا۔(تصویر05)

اگر آپ اسے پہلے سے موجودہ ونڈوز کے ساتھ انسٹال کرنے جا رہے ہیں تو یہ سب سے اہم اور خطرناک مرحلہ ہے۔ اس مرحلے پر کسی بھی قسم کی جلد بازی کے نتیجے میں آپ اپنے تمام ڈیٹا سے ہاتھ بھی دھو سکتے ہیں۔

دراصل یہاں پہلے تو یہ منتخب کرنا ہے کہ لینکس منٹ کس پارٹیشن میں انسٹال ہو اور دوسرا اسے کتنی اسپیس استعمال کرنے کی اجازت ہے۔ ظاہر ہے کہ آپ نے اسے اپنے پہلے سے موجود آپریٹنگ سسٹم کی مکمل ڈرائیو عنایت کر دی تو یہ اسے مکمل صاف کر دے گی اور پہلا آپریٹنگ سسٹم استعمال کے قابل نہیں رہے گا۔
اس مرحلے پر نیچے موجود آپشن ایڈوانسڈ پارٹیشنگ ٹول (advanced partitioning tool) منتخب کریں تاکہ باآسانی ہارڈ ڈرائیو پارٹیشن منتخب ہو سکے۔ اسے منتخب کرتے ہی اگلی اسکرین پر آپ کو ہارڈ ڈسک کے تمام پارٹیشنز دکھائے جائیں گے۔(تصویر06)

یہاں بہت ہی آرام اور تسلی سے وہ پارٹیشن منتخب کریں جس میں لینکس منٹ انسٹال کرنی ہو گی۔ پارٹیشن تلاش کرنے میں کچھ دشواری ہو سکتی ہے کیونکہ یہاں تمام پارٹیشنز sda1 اور sda2 اور اسی ترتیب سے موجود ہوتے ہیں۔ اپنے پارٹیشن کے فائل سسٹم یا اس کے سائز سے اندازہ کر سکتے ہیں کہ کون سا پارٹیشن C ہے اور کون سا D وغیرہ۔

چونکہ ہم پہلے موجود آپریٹنگ سسٹم ختم کرتے ہوئے لینکس منٹ انسٹال کرنے جا رہے ہیں اس لیے قوی امید ہے کہ ونڈوز C ڈرائیو میں موجود ہو گی۔ اس لیے سی ڈرائیو کو منتخب کرکے نیچے Change کے بٹن پر کلک کریں۔ آپ کے سامنے ایک چھوٹا دریچہ نمودار ہوگا جس میں سب سے پہلے آپ کے منتخب کردہ پارٹیشن کا سائز لکھا ہوگا۔ اُس کے بعد پارٹیشن کے فائل سسٹم کے انتخاب کا آپشن ہوگا۔ آپ Use as کے منیو سے Ext4 journaling file system منتخب کریں اور اُس سے نیچے پارٹیشن فارمیٹ کرنے کے آپشن پر چیک لگادیں۔ آخری مرحلہ یہ ہے کہ آپ ماؤنٹ پوائنٹ (Mount Point) کے مینو سے / منتخب کریں گے جس سے لینکس آپ کے پارٹیشن کی روٹ ڈائریکٹری میں نصب ہوگی۔(تصویر07)

اس کے بعد جب آپ OK پر کلک کرکے آگے بڑھنا چاہیں گے تو ممکن ہے کہ آپ کو خبردار کیا جائے کہ اس عمل سے آپ کے پارٹیشن پر موجود تمام ڈیٹا ضائع ہوجائے۔ اگر آپ اپنے ڈیٹا کا بیک اپ لے چکے ہیں تو آپ کو پریشان ہونے کی کوئی ضرورت نہیں۔
اب Install Now کے بٹن پر کلک کریں۔ اگلی ونڈو پر آپ کے مقام کے بارے میں دریافت کیا جائے گا۔(تصویر08)